Фуқаро Х.М. ўз мурожаатида 2012 йилдан буён Халқ банкининг мазкур филиалида бир нечта вазифаларда ишлаб келаётганигини, 2019 йил сентябрь ойидан бола парвариши учун таътилга чиққан бошқа ходимнинг ўрнига муайян муддатга ўтказилганлигини маълум қилган.

Бироқ 2020 йилнинг ноябрь ойида тегишли қарор билан мурожаатчи ишлаб келаётган иш ўрни (штат) қисқартирилган ва унга банк бошқарувчиси томонидан 2021 йил февраль ойи меҳнат шартномасини бекор қилиш тўғрисидаги огоҳлантириш хати юборилган. Шу билан бирга, банк раҳбарияти (иш берувчи) томонидан меҳнат қонунчилиги бўйича ўша даврдаги мавжуд вакант иш ўринларидан бири фуқаро Х.М.га таклиф этилмаган.

Шунга кўра, мазкур мурожаат Омбудсман томонидан ўрганилиб, Ўзбекистон Республикасининг меҳнат қонунчилиги ва тегишли норматив-ҳуқуқий ҳужжатларга асосланиб, Халқ банкининг республика раҳбарияти номига Омбудсман мурожаати юборилган. Натижада мазкур мурожаат юзасидан Халқ банки Фарғона вилояти филиали ходимлари фуқаро Х.М. билан учрашиб, унга ушбу банкнинг Бағдод филиалидан иш таклиф қилинган.

Ҳозирда мурожаат эгаси мазкур банк филиалида иш фаолиятини давом эттирмоқда.

Олий Мажлиснинг Инсон ҳуқуқлари бўйича вакили (омбудсман) Матбуот хизмати