Navoiy viloyatidan yuborilgan murojaatda Navbahor tumanida yashovchi fuqaro M.Yu. noqonuniy ravishda ishdan bo‘shatilganini yozgan edi. Mazkur murojaat Ombudsmanning Navoiy viloyatidagi mintaqaviy vakili tomonidan viloyat Kambag‘allikni qisqartirish va bandlik bosh boshqarmasi bilan hamkorlikda o‘rganildi. O‘rganish davomida maʼlum bo‘lishicha, M.Yu. tug‘ruq taʼtilidan qaytganida uni o‘z lavozimiga emas, balki tug‘ruq taʼtiliga ketgan boshqa xodimning o‘rniga ishga qo‘yishgan. O‘sha xodim ishga qaytgandan so‘ng esa murojaatchi M.Yu.ni ishdan bo‘shatib yuborishgan. Ombudsman aralashuvidan so‘ng, fuqaro M.Yu. o‘z ishiga qayta tiklandi va hozirda faoliyat yuritmoqda.

Quyi Chirchiq tumanidan yuborilgan yana bir murojaatda fuqaro pensiya hisoblashda barcha mehnat faoliyati hisobga olinmaganidan shikoyat qilgan. Murojaatchi N.I. 2023 yildan beri Byudjetdan tashqari pensiya jamg‘armasi tuman bo‘limiga fermer xo‘jaliklarida ishlagan 6 yillik ish stajini pensiya hisob-kitobiga qo‘shish bo‘yicha murojaat qilgani, biroq natija bo‘lmaganligini maʼlum qilgan. Murojaat Ombudsmanning Toshkent viloyatidagi mintaqaviy vakili tomonidan joyiga chiqib o‘rganildi. O‘rganish natijalariga ko‘ra, Ombudsman tomonidan kiritilgan taʼsir chorasi natijasida Byudjetdan tashqari pensiya jamg‘armasi Quyi Chirchiq tuman bo‘limi komissiyasining 2024 yil 31 maydagi qarori haqiqiy emas deb topildi va 6 yildan oshiq ish staji umumiy mehnat stajiga qo‘shib hisoblanishi belgilandi. Pensiya bo‘limiga fuqaroning pensiyasini qayta hisoblash vazifasi yuklatildi.

Oliy Majlisning Inson huquqlari bo‘yicha vakili (ombudsman) Axborot xizmati